Värslischmitte Brugg


Fasnacht
 

D Wüehlmüüs

Ganz im Gegesatz zu Bärn hett Aarau eifach niemer gärn. Aarau kennt me wenigschtens au, Vo Brugg hingäge redt kei Sau. 
 
Mer wette gärn in swisscom-Lade und fahre mit em Zug vo Brugg uf Bade. In Turgi warte mer öppe e Stund, will d Ablösig vom Lokifüehrer nid chunnt. 
 
Clencore baut Rohstoff ab uf dr Wält und macht eso e Huffe Gäld. S BKS hett s glych Ziel uf Ärde: Bildig isch Rohstoff und muess abbaut wärde. 
 
Jetz wott dr Hürzeler gegestüüre und holt das Arcus hindefüüre. 69 Millione wärde d Kasse leerer, nid für d Bildig, nur für d Lehrer. 
 
Uf em Lauffohrer Fäld wird Wasser gstaut, will dr Schwarz neu Ris abaut. Was wott dä dört no meh abaue, dass sie jetz au Auto staue. 
 
Wäg de Umwältvorschrifte gsehsch bald kei Chare, nur Rinder dörfe no CO2 lo fahre. D Chüeh vom Müller chönne denn dank dr OASE vo Lauffohr diräkt uf Windisch go grase. 
 
Stritte, händle, umeschreie, schwiige, rätsche, Gschirr verheie. Infantil und zimli chindisch, grad wie in dr Schuelpfläg Windisch. 
 
Durs Muusloch  göhnd mer zrugg in d Stadt. In dr Süessbachunterfüehrig findet grad es Velorenne statt. Im Städtli sälber, s isch leider wohr, isch alles wie vor hundert Johr. 
 
D Wasserstoffbüss sin guet, aber z tüür. S Taxi Kolibri fahrt nüm vo Tür zu Tür. Dass d Suppebar schliesst, isch au kei Gäg. Alles Guete muess z Brugg wäg. 
Mir frooge uns, was d Politiker dänke, wenn sie s Gschick vom Städtli länke. Statt s Härz, unseri Altstadt, z aktiviere, tüend sie in d Vorstadt investiere. 
 
50m Busspur für Millione, Ihr froged euch, tuet sich das lohne. Mer wüsse ebe, worum das verhebt: das ghört zum neue Abfallkonzept. 
 
Apropos Abfallkonzept, do hämmer ghört, dr Stadtrot fühlt sich echli gstört. Es tuet jetz langsam duredringe, dass me die leere Fläsche muess ins Stadthuus bringe. 
 
S Gheimnis vom Abfallkonzept zum Schluss: Mir wüsse meh, dr Schuss isch duss. Dr CIA hett das Konzept lanciert, us de Abfallsäck wird jetz spioniert. 
 
Mer chöme das Johr nid dra verby. Dr General-Azeiger muess updated sy. Die Redaktion sött Nochhilfstund ha, wenn sie Plakette und Thema nid zuordne cha. 
 
Für Schnitzelbänkler isch das Johr famos, denn ei Problem sin mer jetz los.  Bim Dichte müend mer nüme flueche, uf Brescianini muesch kei Reim meh sueche. 
 
Für Schnitzelbänkler isch es nid famos, das Problem wärde mer nie los. Dr neui Schryber heisst Guggisbärg, do rymt sich gopfriedstutz nur Zwärg. 
 
D Värslischmitte hett e gueti Idee. Die Diskussione um e Klimawandel sind passé. Mir göhn in e anderi Galaxy und lönd dr Dräck uf dr Ärde lo sy. 
 
Mer müend s Abfallkonzept nomol erwähne. Das gilt do und au im Latärnli äne. Ei Sammelstell tüen mir betreue, über Wysswy würde mir uns freue.