Vom Ratteloch ghörsch gueti Sache: De Kanton well vorwärts mache. Doch d’Velofreaks finde i der Suppe es Hoor – denn warte mer halt nomol 5 Johr …
Bis Windsors hanget de Hussäge schief: De Brexit druckt sie abe tief. Harry und Meghan laufe nümm ganz rund - und de Andrew het Gedächtnisschwund …
Die AZ-Site am Valentin Het mir brocht en grosse Gwinn: Scho lang hani nämli welle wüsse Sit wenn de Roli tuet d’Elsbeth küsse …
Zwöimol kandidiert und zwöimol gwählt: Zwüsche Bärn und Aarau de Gallati sich quält. Für ihn git’s do kei Rascht und Rueh: Was het ächt das mit „Gsondheit“ ztue?
Bundesröt wo laufe wie d’Beatles über d’Stross - Das Bild, das wär en Renner gsi für chli und gross! Bedänke händ d’Jurischte – schad! Jetz hocke si do wie immer – fad!
„InBrugg“ wott, dass z’Brugg öppis lauft Und a Fronlichnam viel wird gkauft. Es Jesus-Double sett d’Wärbig mache: En Pfarrer findt das ned zum Lache …
Frau K. und Herr M. vo der Schuelpfleg Windisch Was die sich leischte, isch nur no chindisch! Bi der Frau Roth hämmer au müesse plange, doch denn isch sie immerhin sälber ggange …
Am Bahnhof Brugg töffsch nümm viel mache: Rollbrett, Velo, Trotti sind verboteni Sache! Erlaubt isch no, han-i geschter erfahre: Mit em Rollkoffer im Muusloch durefahre …!
Im Oktober hani glitte bi de Wahle Wäg de viele Kandidate Quale!: Die choge CVP – Ihr wüssed’s no - Het de halb Kanton uf d’Lischte gno …!
De FV-Doppelstock vom Bombardier, isch en Pannezug, ojehminee! Speziell das Schüttle wott mir ned gfalle - de isch vom Corona-Virus befalle …!
De Reto het’s mit em Abfall schwer: Die graue Säck stöhnd chrüz und quer. Er luegt uf Windisch und seit „Läck“, für Ornig bruchts orangschigi Säck!
D’Selecta tuet en Slogan überlegge: „Ein Automat a jedem Egge!“ Brugg und Huuse säge „NEI“! - De Windischer isch das einerlei …