De 39-Jährig 2016

Cologna, Küng, Federer, di halb Sport-Nation,
Liit sit Wuche-n-uf der Chranke-Station.
Aber eine isch gsund, jetz müender lose:
De Wawrinka mit dene Schotte-Hose ...

Grosse SoftGun Skandal uf em Bözberg obe
Doch eigentlech müesst me dä Lehrer lobe:
Die Waffe tüend doch im Wehrwille nütze,
zum de Bözberg vor em A-Müll z’schütze ...

De Hugo wott goh, das macht eus truurig,
au d’Konfettispalter tüend liide schuurig.
De Hugo sett bim Nachfolger en Rot deponiere:
De Rathuussaal sell er denn früeh reserviere ...

Die Bistro-Wägeli vo der SBB
grad no ufegjublet, bald niene meh.
Das tönt für mich wie “hüscht und hott“:
D’Frau Pilloud weiss ned, was si wott ...

D’SVP spielt “... und ehr sind duss“,
Z’vel Lüt i der Schwiiz gäb nume Verdruss.
Debi sorgt doch de Blocher selber
für Dichtestress mit sine-n-Anker-Bilder ...

Vierzg Johr schwarz-wiiss – ich tue gratuliere,
Eue-n-Isatz für d’Fasnacht tue-n-i höch eschtemiere.
Meh Müeh ha-n-i do mit em neu-schwarze Chleid:
Sind Ihr wägem Hugo so tief im Leid?

D’Polizei tuet sich rüeme als “Hälfer und Fründ“ -
sit em Wienachtsmärt glaubt das nümm jedes Chind:
En guete Brugger i Handschälle, e truurigi Gschicht!
Sind ächt die Type ganz obe no dicht?

Z’Klote de Bin Khalifa mit eme Bobo am Bei
het z’Nacht dörfe lande grad wie be ihm dihei.
Sicher het dä, wo das z’Bärn het deichslet
Dä Emir vo Katar mit em Sepp Blatter verwächslet ...!

Z’Oberwil-Lieli isch de Glarner gsi de King,
mit der Jeanne d’Arc Gündel het er’s nümme so ring.
Er wott abschotte, usgränze, bliibe stur,
doch im Dorf gilt jetz d’Willkommens-Kultur ...

I der Kasse vom Aargau tuet es grosses Loch klaffe –
De Brogli het au gnue, er wott nümm go schaffe.
Di letscht Hoffnig heisst Loosli im Fricktal unde:
Dä het mit eme Mulwurf en Silberschatz gfunde ...

Zum Glück het di neu Underfüehrig am Bahnhof,
Näb der Stäge kei Rampe, wil das wär ächt doof:
Denn würde nämli nomeh Länker probiere
Det abe zfahre zum det unde parkiere ...

De Bundesrot het schinz am Mittwoch z’Obe
D’Abstimmig “2. Röhre“ uf spöter verschobe.
Di neu NEAT sell d’Auto-Lobby bekehre,
susch luegi dr Alpeschutz no ganz i d’Röhre ...

E Romanze-n-im Eigenamt mit Härz:
Lupfig goht uf Bruutschau z’Schärz!
Mit Schinznach-Bad tuet flirte Brugg:
Ach, chäm doch Brugg uf Windisch zrugg ...!