De Retro-Futurischt 2018

Dä Streife müess wägg, es seig wägem Stau,
dur d’Underfüehrig lauft halt kei Sau.
Gänd doch dene, wo gönd undedure det
Für de Campussaal es Freibillett …

D’FDP Brugg isch würkli z’bedure:
Zersch muess de Titus bös undedure.
Denn het er als Stadtrot ned afo welle –
Und bim ER-Vize händs nümm chönne zelle …

Bim Poschtauto händs Bilanze frisiert
und so au höcheri Boni garniert.
D’Frau Ruoff stoht plötzlich au im Räge,
und mänge muess no „me too“ säge …

Eis Johr g‘regiert – sie het’s nonig erlickt,
het en Huufe Lüt i d’Wüeschti gschickt.
Vo Brugg goht sie wägg, isch jetz z’Rothrist:
Das passt doch guet – Roth ehnder trischt …

Z’gross findet Aarau s’Projekt i der Aare –
chliner, seit d’IBB, chönn si ned fahre.
Die wänd emänt, statt Boje z’finanziere,
s’Gält lieber i Bitcoins investiere …

S’Lieblings-Tool vo Meiers Claudia
i der AZ isch petitio-punkt-ch.
De Dani Moser het das ned gwüsst,
drum het sie zum Absched ihn ned küsst …

Em Didi Berger sis Wunsch-Profil
Füehrt ohni Kandidat halt ned zum Ziel.
De Titus wett, doch er chonnt ned a.
Am Schluss heisst d’Quittig: Barbara …!

Brav wi nie tuet de Trump am WEF,
nur isch das leider nüt als Blöff:
Ihm wär doch, wenn er hätt duredreyt,
e Dachlawine uf d’Frise gheyt …!

Windisch het Müeh mit em K-E-S-D:
D’Regierig wott drus, s’Parlamänt seit „nee!“.
Au z’Brugg hindertloot das Gerangel Spuure:
De Reto seit „Tschüss, ich go go muure …!“

Trotz Isatz als Hündli s’letscht Johr a der Fasnacht
Het de Titus bi de Wahle nur Zwöite gmacht.
Drum macht de Jürg Baur um d’Fasnacht en Boge:
Er isch für de Wahlkampf uf Korea gfloge …

„Burglind“ und “Evi“ legge Wälder flach,
blose-n-Auto vo der Stross, vo de Hüser s’ganzi Dach!
„Franzsika“ loht, i finde’s ned läss,
ken Stei uf em andere im D-G-S.

D‘ Schueh vom Hugo sind Dir chli zwiit –
s’Konfetti-Spalte seit Dir nüt –
doch tuesch a dr Fasnacht öppis büte:
Steini, Du bisch e Wundertüte …!

Bim Dahlihuus weiss Huuse ned witer,
z’Windisch gohts em Bossarthuus schitter.
Brugg löst s’Problem bim Kupperhuus
mit „Trachsel Railway“, die chöme druus …