Värslischmitte Brugg

Fasnacht
 

Hexenrede 2016

Eis zwei drü & hopp de Bäse, mir tüend Brugg d Levite läse

Jedes Johr bevor de Hugo sines Amtes tuet walte
und uf em Storcheplatz s Konfetti got go spalte
het er im Rathussaal vom Stattätti de Schlüssel becho
doch das Johr klappets gar ned eso
Konfettispalter händ ned reserviert
Und Frau Bescianini het au nüt gstudiert
Im Rathussaal hämmer hüt Architekturmodell gfunde
zum Glück het d'Justitia d'Auge verbunde

"Zunftmeister Hugo ist ein Mann von Tradition",
Jede weiss: schwarz-wyss isch syni grossi Passion
Vor villne johr wo n är no jung isch gsy
dänkt är, so Musig mache chönnt i no gly
Nur z'Instrumänt müesst schwarz-wyss sy
Susch bin ich sicher nid deby!!
Als Pianischt macht är sich würklich guet
Wyss esch z'Hömmli schwarz de Huet!      (Hut)
Hugo heb doch Muet, Farb tuet eifach guet

Käi Problem gseht er bim wähle vomne Bruef
er folgt eifach sym schwarz-wysse Ruef
Är isch vif im Chopf und schafft gärn akkurat
scho setzt är schwarzi Lettere ufs wyss Plakat. (Girlande)
Hugo heb doch Muet, Farb tuet eifach guet
E paar Jöhrli hockt er im Ywohnerrot
Luegt, dass im Städtli alles guet got
doch plötzlich tuet er mit paar Kumpels revoluzioniere
Findet tatsächlich Brugg und Windisch sötte fusioniere
Aber Brugg luegt, dass ned so wiit chunt,
dene esch s’Windischer Wappe vil zbunt. (Luftschlangen)
Hugo heb doch Muet, Farb tuet eifach guet
Am Hugo syni Hoor sin wyss wie Schnee
D'Cornelia han ich emol mit Rote gseh
Brun sinds bi zwöine Töchtere oje,
Das tuet em Hugo scho fascht weh
Nur die Jüngschti, die isch würklech gschickt,
Mol schwarz, mol wyss, sie hets erlickt (Perücke)
Hugo heb doch Muet, Farb tuet eifach guet
Als Zunftmeister gisch du dis Amt jetzt ab
aber schwarz-wiss hesch nonig würklich satt
Drum los jetzt euse letschte Wille:
iss vo jetzt aa farbigi Pille
Hugo heb doch Muet, Farb tuet eifach guet      2x

Verse Bühne Hexengericht

Z' Brugg i de Verwaltig tüen si chly dämpele
chly umesitze, Kaffi trinke und chly schlämpele
doch jedes Baby weiss: nach em Äschermittwoch isch's famos
syt 40 johr got do im Stettli d'Fasnacht los.
Dass me denn am Donnschtig de Rathussaal wird bruuche
müesstisch dene jede Tag id Ohre huuche

Eis zwei drü & hopp de Bäse, mir tüend Brugg d Levite läse

De Hugo goht obwohls kei Neue git
das isch für d Konfettispalter gar kein Hit
Wo führt das hie? Wie sölls wiiter goh?
Schwarz-wiss , schwarz-wiss stöhnts trurig do
D Migros hät für d Zuekunft d Lösig in Hände
und möcht eusi Spalter als Strichcode verwände.

Eis zwei drü & hopp de Bäse, mir tüend Brugg d Levite läse

Dr schwarz-wyss Storch isch go nöii Spalter sueche
Er het käini gfunde und het innerlich afo flueche
Nur mit em luut klappere klappets eifach nid
Probier mol öppis anders liebe Hugo Schmid
mir dänke chönntisch d'Löcher im Vorstand stopfe:
schick doch mol e Buntspächt zum aachlopfe!
Eis zwei drü & hopp de Bäse, mir tüend Brugg d Levite läse

S Primavera und d Latinobar sind fascht usse a de Stadt
das findet sicher d Rekrute cheibe glatt
So äs Rotlicht bruchet mir doch nöd
au a de Casinochrüzig isch es rots Liecht blöd
Sind d Brugger den so verläge?
Wänd sie nüd sexuells erläbe?
Nei, nei sie händ d Luscht ned verlore
es vergnüegt sich mit de Nagra Riisevibratore

Eis zwei drü & hopp de Bäse, mir tüend Brugg d Levite läse

Bauer sucht Frau - stimmt ned - nei
aber susch isch de Baur iï jedem Job dehei
Als Samichlaus, und als Iwohnerrot
weiss er genau wo's duregoht
und jedesmol wä mer de GA  ufmacht
geseht me  de Jürg wo eim entgegelacht
nur bi eim Job tuesch di no zrugg halte
söttsch a Stell vom Hugo s Konfetti spalte!

Eis zwei drü & hopp de Bäse, mir tüend Brugg d Levite läse

D IBB wott neuerdings viel Gäld verdiene
Und i de Aare Flussturbine installiere
Doch die Dinger sind no ned erprobt
alles was schwimmt isch bald in gröschter Not
Was passiert wenns mit em Strom ned klappt?
und d‘Elektrizität is Wasser schwappt?
Täglich en Chlapf im Wasser - s'isch wie's isch
D IBB verdient denn's Gäld mit frischem Fisch

 Eis zwei drü & hopp de Bäse, mir tüend Brugg d Levite läse

Dur d'Altstadt chasch nur i ei Richtig fahre
Für d Habsburgerstross bruchsch gschieder gar kein Chare
S'isch verbote dur die Stross und dur die säb
drum hätt d Marie Heim Vögtlin ihre eigeni Wäg
Au de Schulthess hät für sich en Allee
Doch mir wettet no äi Stross meh!
Do chasch fahre wiet wotsch – es gäb kei Azeig
Die Stross wär denn de Heinz Trachsel Steig

Eis zwei drü & hopp de Bäse, mir tüend Brugg d Levite läse

Basel und Brugg-Windisch sind Städt vo Rang und Name
und stöhnd i de Schwiiz ganz vorne ane
D Wirtschaft lauft und d Medizin hät ihres Zentrum
Beidi händ ä Hochschuel - das isch au ned dumm
d Fasnacht isch de Höhepunkt vom Johr
aber mir sind besser - äs isch würklich wohr
mit de IIsbahn - nähmet mich bim Wort
semmer im Gegesatz zu Basel sogar en Wintersportort!

Eis zwei drü & hopp de Bäse, mir tüend Brugg d Levite läse

S Musloch isch verstopft a jedem Morge
au d Bahnunterfüherig vor em Tunnel macht eus Sorge
D Süessbachunterführig isch ä Grotte
und s durefahre eh verbote
Wie wotsch den überhaupt die Bahngleis überwinde
es isch kei passendi Unterführig z finde
endlich  finsch en Wäg zum uf die andri Siite z glange
MISCHT, blibsch mit em Auto glatt id de Stäge hange

Eis zwei drü & hopp de Bäse, mir tüend Brugg d Levite läse

Es schneit in Brugg, de Winterdienscht isch garantiert
mit em Auto chunsch dure, ganz unkompliziert
doch z'Fuess und mit em Velo häsch immer Pech
all Wäg sind iisig das isch doch cheibe frech.
Häsch au nur en churze Wäg zum Arbeitsplatz
muesch s Auto neh, susch haut's di uf de Latz

Eis zwei drü & hopp de Bäse, mir tüend Brugg d Levite läse

Dr Leo liedet bim budgetiere Quale
wäge inexischtänte rote Zahle
Er befürchtet mit Brugg gohts hinenabe
gly goht dä uf Frick nocheme Schatz go grabe

Eis zwei drü & hopp de Bäse, mir tüend Brugg d Levite läse

Dr Reto isch jung und ganz ä flotte
Er macht nid viel, het nur 1 Marotte
Wenn  är zu de Seniore chunnt, fön sie afo jubiliere
Er tuet gäge Demänz Rhytmikkurs organisiere
Eis zwei drü & hopp de Bäse, mir tüend Brugg d Levite läse

Wenn d‘übere Willi ä Värs wotsch schrybe
Chasch grad im Näscht ligge blybe,
niemer weiss was dä so tuet trybe
ach, was sölls mir hän au susch gnueg z'schrybe
Eis zwei drü & hopp de Bäse, mir tüend Brugg d Levite läse

Euse Amme tuet mit Schinznach Bad verhandle
Die wänd sich als Gmeinde villicht verbandle
D' Ammon vo Windisch fahrt do zackig ii,
Was schwätze ehr und ich bi nid deby?
und fertig isch die schöni Harmonie
Wo am Moser sooo wichtig wäri gsy
Eis zwei drü & hopp de Bäse, mir tüend Brugg d Levite läse
D' Frau Metzler het do scho meh Profil
und ihre ganz eigene Stil
Wenn sie öppis nid wett
Seit si lut und dütlech: niet
Eis zwei drü & hopp de Bäse, mir tüend Brugg d Levite läse
S' isch nid so eifach für de Frittig Bürger z'finde,
Wo sich im Iwohnerrot  z'Brugg   wänn schinde
s’isch simpeleifach i dä Rat ine z’flutsche
D’SP suecht no Lüt zum nocherutsche.
Töchter, Söhn und Schwiegertöchter hän si lengscht platziert,
Drum händs  jetzt no vo me Junge dr Vatter ynebugsiert
Villicht wott öpper vo öich no go mit Nichte und Näffe
dr  Iwohnerrot z'Brugg isch nämlech es Familieträffe
Eis zwei drü & hopp de Bäse, mir tüend Brugg d Levite läse
S Fasnachtsmotto s'isch schwarz wiis
und d Fasnachtsgwändli sind schwarz wiis
Mit em Brugger Wappe isch es au so
Mir müends wiiterhin schwarz wiis beloh
Ob Mode, Pfärrer oder Klavier drininne
Für die mag schwarz wiiss würklech stimme,
doch de Stadtröt söttet bi ihrem länke
ned nome schwarz-wiss dänke.

Eis zwei drü & hopp de Bäse, mir tüend Brugg d Levite läse

Brugg oh Brugg du Prophetestadt
mir händ dis schwarzwiis dänke satt
jetzt höred mir uf  mit referiere
Und tüend euch d'Häxesuppe serviere
(nur poltern)

Verse Salzhaus 2. Auftritt

Me seit im Mittelalter hebets d‘Häxe furchtbar triebe
Alls wo ned guet gsi isch, het meh ihne zuegschriebe:
Es lahms Bei oder eine wo fremdgoht
En Erdrutsch, kei Räge oder Schnägge im Salot
S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Wenn‘s heiss esch veross, wärsch am liebschte blutt
Doch dunde i de Badi isch de Filter kaputt,

S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

D’Führwehr isch grennt und grennt,
trotzdem isch d‘Hüehnerfarm abe brennt;

S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Und wie isch es denn hüt?
Me zeiget mit de Finger uf d‘Lüüt
Und wem me das nöcher würd bschaue
denn sind das meischtens weder d‘Fraue

S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Bisch z fuhl zum franz oder dütsch studiere
wotsch lieber Zobig dur d‘Beize spaziere
So liit am Morge nur en Einer drin
und d‘Schuld isch wieder d‘Lehrerin

S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Me tuet öppe uf de Yvonne umriite,
sie tüeg ehri Kompetänze überschriite
Aber de Moser hets jo akzeptiert
doch wer isch jetzt die aagschmiert?
S‘isch alles Häxewerk, s'cha niemer öppis defür
drom chömet die Wiiber ufs Holz und is Füür
D’Frau Horlacher tuet sich exponiere
Und neu de Iwohnerrot präsidiere
Aber als Grüeni chönnt's no sii
dass sie sich uskennt mit Magie
S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Im Stadtrot häts nur no eis wiiblichs Wese
aber die  verstohts de Manne d‘Levite z‘lese
Doch die findet das allerhand
und wünschet si is Pfäfferland
 
S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Sie tuet ihre gschyde Idee bi de AKAD verbreite
Spöter mol es Bundesamt ganz locker leite
Doch d'Prophete z'Brugg bechöme das nid mit
D'Ursi Renold wott in Stadtrot, doch gwählt wird sie nit

S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Für alles Schlächte wo z'Brugg eso passiert
Hätti me vor 40 Johr do d’Häxe drangsaliert

D’Häx isch tschuld, d’Häx isch tschuld
S’isch fertig mit üsere Geduld,
sie muess verbrenne i de Gluet
denn wird im Städtli alles wieder guet

S‘isch alles Häxewerk, s'cha niemer öppis defür
drom chömet die Wiiber ufs Holz und is Füür

Jetzt gänd eus endlich e Häxetrunk
Susch mache mer do no länger Stunk!