Värslischmitte Brugg

Fasnacht
 


Oschterzäpfe

Russland, Putin, Kreml, esch mer alles ned so ghüür,
sit Skandal-Sotschi brännt i mer au nöm s’olympisch Füür, 
ich wörd jetzt ämel grad ned supergern uf Russland goh,
Dass Italie deet ned tschutte will, chani voll verstoh,

Ob g’faked oder au ned ich has doch dänkt: es goht ned ohni:
S’Comeback vo letscht Johr sind ned d’Kellys, nei de Berlusconi.
Chli Botox, Gäld, chli Mafia & vom Dokter dure-checke,
& ganz en neue Bumba-Bumba-Coach   … s’esch de Jürg Jegge.

En Toaster & es Rittiseil, es Joghurt, es Florett,
E Tulpezwible, Vorhangstoff, chaufsch alls im Internet.
Die chline ond die chlinschte, jo, die sind scho tot, die Lädeli,
bald stärbed au die grosse uus, die met de grosse Wägeli.

SALE – das esch de Usverchauf deet wos no Waar verchaufed,
zahlsch de halbi Priis för Sache wo sosch ned rächt laufed,
doch SALE gits au im grosse Stil, d’Chinese gänd ned Rueh,
die chaufed schwizer Firme - SAIL AWAY – die griffed zue.

Brexit, Balkan, Spanie: d’EU bröcklet vor sech hii,
& z’Bondo sinds verlecht alls so Italie-Bröckli gsii,
wenn d’Lüüt vo dere EU amix nochli zäme taage,
suecheds noch Idee-e, wie sie d’Schwiz no chli chönd plage.

Es Hightech-Bio-Startup bin ich geschter goge gründe,
d’Idee vo de Erfindig esch bestächend – liebi Frönde,
Stächmogge chrüz ich met Glüehwürmli – nei dasch ned zom Lätsche,
denn gsämmer alli ändlich wo mer z’Nacht müend anetätsche.

Wennt reisisch met der SBB – esch ganz egal wo he,
denn stosch & hesch Verspötig, & zahlsch au immer meh,
de Chef, de Meyer meint do druf, dass türer wird seig logisch,
de Reisend wäg Verspötig jo au länger drinn im Zog esch.

Liebe Roger Federer, das settsch erfahre haa
I de Tennis-Wält besch du för eus de beschti Maa,
de stärchschti Ufschlag aber max der au ned rechtig passe
de händ no immer Prämie vo de Schwizer Chrankekasse.


Bis im Johr 2030 will Dütschland – läck wie gschiid,
De Choleusstig fertig ha – es wird au langsam Ziit.
Air Berlin und Boris Becker werded konsultiert,
well die händ ihre Choleusstieg scho realisiert.

Mer weiss jetzt was die VW-Lüüt vo ihrne Chunde halte,
well si doch met Tierversüech tüed ihri Autos gschtalte,
Affe müend deet Abgas-Schnüffle, do simmer alli paff,
das längt jetzt dene wörkli mol! „en Aff esch jetzt enough.“

D’USA sind nömm debi zom euses Klima schütze,
die meined dass im Cashflow & dr Umwält nüt wörd nötze,
die Umwält seig doch sälber gschuld, s’wär s’beschte wenn die tot sig,
dasch logisch: ohni Umwält gits au kei Umwältverschmutzig.

Z’Amerika im Wisse Huus lauft d’Stellebörse heiss,
s’esch nonig ganz DAS Jobwunder – nur Personalverschleiss.
Jetzt het de Präsi sälber sech grad gschpickt – hey, Mann. Chonnsch druus!?
Das esch jetzt doch de Hammer… doch de Tweet esch nor Fake News.

De Fridensnobelpris de goht an Trump & au an Kim,
die beide Männer, wer hets tänkt, die sind es Friedensteam,
si händ sech beid so guet beherrsch, händ s’rote Chnöpfli nonig trockt,
doch dass der Ander jetzt en Priis bechonnt, macht dese ganz verrockt… 
… & wer weiss wenn er trockt!
En Cassis hockt im Bundesrot, will eusi Schwiz cho rette,
Ich kenne nor vom Migros do die Cassis-Lutschtablette,
A la Cassis-de-Dijon importiert, glaub ich esch de ehner,
„TI“ heisst ned Tessin be dem, es heisst „Trotzdem Italiener“.

De Cassis, de vom Bundesrot, het scho vell komischs gmacht,
„Pro Tell“, denn weder nömm so „pro“ - & das schnell öber d’Nacht,
& meint er, dass mer s’Kokain legalisiere sett,
Dasch immerhin en Bundesrot… wo en Linie het.

Mer gseht nor rot be de Frau Roth, ned mol s’Sünneli tuet lache,
Es weiss niemer was die z’Aarau obe wörklech so tuet mache,
Do truckt ein uf de Chnopf! De Trump? De Kim? Mer müend eus rette!
Doch s’esch nor de Cassis wo versuecht d’Frau Roth z’Resette.
Well s’Doris Leuthard gnueg het glii mit dem Bondesrate,
esch wider öpper anders draa, dr Aargau mues jetzt warte,
en Maa wörd glaub för’d CVP die nöggscht Rundi-i-lüüte,
im Wallis ond’ deet gäbs en chline Trump & de heisst Buttet.

D’Frau Kopp, d’Frau Metzler, d’Widmer-Schlumpf & au d’Frau Dreifuss, 
& d’Sommaruga, ond d’Frau Leuthard, jo, die git Bleifuess.
Das sind scho sächs, e gueti Quote, was wotsch do no meh? 
wennt wörkli no e sibti wotsch zellsch halt au d’Calmy-Rey.

Das mit dem „Hashtäg Metoo“ han ich nonig ganz kapiert,
de Weinstiin ond Konsorte werded so doch informiert,
wie fruchtbar sie grad sind das froget sie vo Frau zu Frau:
„Wie eschs be der denn aktuell: Hesch Täg? Metoo. – Ich au.“

Uf änglisch duzis easy, heisst: “you can say you to me”,
„Echli Münz“, dem seit mer „Bitcoin“, het grad niemer gern debii,
Das Änglisch esch doch ned so schwer, ich lehr euch grad no meh:
“Do you want a Bitcoin-Tea?” Heisst „Nimmsch chli Münzetee?“

Will de Fricker Jonas Säu mit Jude het vergliche,
händ ihn d’Medie ond d’Partei zimli arg verstriche,
nohgrutscht esch d’SI… esch e Sie doch au für die wird’s einisch knäpper,
wenn die so id’ Kerbe haut wie ihre Frönd de Schepper.

Min Nochber het scho meh als 20zig Johr die gliichi Jagge,
im Usverchauf, Anno 94, chönne sech ergattre,
er brucht en Noii & fluechet luut - de Grund esch för die Gschicht,
ovs, oh verdammte Seich – de Vögele het dicht.

Er wott no schnell in Swisscom-Shop, doch glingt ehm das au ned,
well de Swisscom-Shop, au dee esch nömme deet,
Denn wott er wäg de Jagge noh in Walser Sport, de Tscholi,
& suecht denn us Verzwiflig ….am Schluss no de Jelmoli.

D’SP Windisch zeigt Profil – ned nor uf de Plakat,
esch zoberscht uf de Nasespitze im Iiwohnerrat,
was das i 4 Johr heisst das wird sich zeige zimli barsch,
velecht esch d’SP denn jo scho ganz hinde ond’ am Rugge.


Im Gmeindrat Schinznach Bad do hockt en Brugger – jede kennt ihn,
& de wott fusioniere dasch plötzlech s’beschte – meint de Trentin.
D’Argumänt sind 180 Grad andersch gsii – de esch doch chindisch,
won er do z’Brugg het opponiert gäg d’Fusion mit Windisch.

Mis halb zerfallne Gartehus will ich grad liquidiere,
do tuet grad en Messias schampar kühn interveniere,
sit denn esch s’Hüüsli Minergie, 3 Lüüt tüend dinne pfuuse,
de Messias-Röbi rückt denn vor is Dahlihuus uf Huuse.

S’Stadtbild vo Brogg esch nömm z’erkenne – alles us de Fuege,
es gfallt mer so noh besser, es esch no es schöners Luege!
S’esch alles vell harmonischer – mer wänd die nie meh zrogg,
well sit me Ziitli wohnt d’Franziska Roth jo nömm do z’Brogg.

D’Frau Regierigs-Roth die wohnt nömm z’Brugg, die hämmer los,
doch muess i die Regierig ein vo eus, vo eus’re Stross,
kän Stadtrat, doch en Offizier, en Grossrat – hols der Geier!
Nor eine wär perfekt för das ond de heisst ….  Dieter Egli.

Er hockt i jedem OK, tuet uf allne Bühne tanze,
er goht a jede Apero, het trotzdem no ken Ranze,
tuet schinbar nömme schnitzelbänkle, doch im Stadtrat macht er Sinn,
vom Feeling her an ich so s’Gfühl, de Jörg hockt scho lang deet drinn.

Auf der Lauer, Campus Mauer bem Fuessgängerstreife

Sieh mal den Fuessgänger a, de wott öber de Streife gah…


Auf der Lauer, isch de Baur     wott in Stadtrat ie (goh)

in Stadtrot ie das törf er scho, nur nie öber d’Campusstreife goh.


Blüemlisalp am ne Summertag,                
wo si si hee, esch üsi grossi Frag,            
hei se nömm troffe vor de Hütte-n-us,            
s’gseht so uus, als eschs met ne’ Schluss        

uf em Bänkli vor em lääre Stall,                
seit se zo mer es esch kei Zuefall,            
i gloube ja die chöme nümme zrügg,            
& hingerlöh die riise Lügg.                    

Alpegletscher chöme mir i Sinn,                
Alpegletscher, si das gsi denn,                
Alpegletscher müesse das gsi sii,             
wo näbe-nüs is Tal, gschmolze sii.            


I be gopfridstutz kei Kiosk, & wott kei rote Wy,                    
I be im Summer 68 nid im letschte Tram in gsii,                    
I be ned giggerig uf d’Ramona höggschtens chli uf’d Rosmarie     
& mer keit nie kei Träne I mis lääre Bierglas drii.                 

„Tschou zäme, es esch schön gsii.“

Leise rieselt der Schnee,                 
es schneit ond schneit immer meh,         
mer frogt sech no hebt ächt de Wald?        
Nei! – lueg d’Lawine chonnt bald.        

Tü-Ta-To    
Poschtauto.
machts halt so....
Es seit en Mählworm vor em Shreddere zom andere,    
glii gits us eus esonen Power-Bar zom Wandere,        
ich wär vell lieber am ne Gartefescht am chille,        
ond denn wördi wie ne Grille mech lo grille.        

För ines Dschungelcamp muesch nömme wiit go sueche,
de Couchepin, Constantin ond Buttet muesch go psueche,
will muesch in Albine im Wallis goge wohne,
doch ersch wennt 10 Johr öberläbsch tuet sech das lohne.

Es schribt de Moser es WhatsApp an Grossrat Meier,
„Lieber Titus mein Stadtamman-Sitz wird freier,
der ischt für dich bestimmt da gibt’s kei Widersacher.“
Nor händ die d’Rächnig gmacht ganz ohni Frau Horlacher.

Es schlot de Constantin de Fringer fascht k.o.,
das hämmer alli gseh - das esch im Fernseh choo,
stell der mol vor, du muesch uf das verzichte,
ganz ohni Billag wörd denn niemert dröber prichte.

De Hüppi ond de Russi chasch nömm gseh ond ghöre,
die händ jetzt beidi - bem Fernseh chönne höre,
das wär en Grund zom min Fernseh useschmeisse,
well die höch Billag-Rächnig esch jo scho chli Scheisse.

Ob met em Tesla, Maserati oder Audi,
jetzt esch es au so wiit: jetzt fahrt au d’Frau vom Saudi,
ond s’esch no praktisch sone Burka, tüend ned lache,
för alli Fahruswis müends no eis Foti mache.

Jo ich hoffe schwer, dass mich jetzt niemert hasst,
well die gross Badefahrt han ich das mol verpasst,
d’Martina Hingis die esch weder pensioniert,
be beidem gmeinsam esch dass all 10 Johr passiert.

Will jetzt jo d’Pizza es Wältkulturerb’ esch worde,
do het sech Frankrich met em Baguette au beworbe,
au us de Schwiz do seig scho ei Bewerbig ab,
ned Raclette, Röschti, Foudue, nei s’goht um Kebap.


Deet händs de Trump & mer do händ d’Burglind,
schlönd alles chorz ond chlii & störmed zimli gschwind,
nor esch be ois i 3, 4 Täg alles verbii,
be dene wird’s no 3, 4 Johr lang eso sii.

En chline Trump das esch au de Erdogan,
wott alli Macht för sech de het de Grössewahn,
es chonnt so wit - weis ned öb ehrs au so gsänd:
de het Kontrolle öber alli Kebapständ.

Wottsch nomol Gletscher goge Luege, muesch pressiere,
do gosch am beschte grad no morn bis vor de Viere,
gosch mit em Chlapf goht d’Schmelzi schneller über d’Bühne!,
denn muesch glaub luege dass scho deet besch vor de drüüne.

Doch es schneit ond schneit ond schneit, s’schneit immer meh,
jo es schneit ond schneit ond schneit ond schneit 5 Meter Schnee.
Wenn das so witerschneit denn säg ich glii: oh je.
Vor luuter Gletscher chasch kei Mittelland meh gseh.

Wäg dene Drohne gseht s’BAZL zimli rot,
& vom Flixbus fühlt sech d’SBB bedroht,
bim dem emoji-Film esch’s schad um jede Franke.
doch Hauptsach: mues ich nie uf Öschtrich goge tanke.

Het ächt de Schumi d’Uriella scho mol troffe?
Uf jede Fall händ sech die zwoi zimli verschloffe.
& F/A-18 Abstürz hämmer lang nömm gseh,
ich glaub de Grund esch: mer händ gar keini meh.

Wenn’s do so wiiter goht & Schnitzelbanke fehle,
tuet sech bald niemert meh do uf’die Bühni quäle,
ehr müend jetzt neui Lüt uf d’Salzhus-Bühni bringe,
sosch mues ich 5x cho ond 5x s’gliche singe.

Schad esch de Trump ned in Las Vegas umgeloffe,
Wer weiss der ander hät ihn deet velecht au troffe,
doch irgendwo müest doch mol ein vo dene si,
s’esch halt nömm s’gliiche höt wie no bin Kennedy.

Wenn ich mol 92zgi be tue-n ich früeh-pangsioniere,
ond zwoi Johr spöter tüend denn Brugg und Windisch fusioniere,
Doch s’esch ned wohr, ich träume nor, so zwick mi doch in Arm,
S’esch alls denn no wie früehner: eis esch rich ond eis het Charme.