De Fescht-Muffel

Bim Tempo scheide z’Brugg sich d’Geischter

De Pesche zeigt der Stadt de Meischter –

Er isch für 30, aber doch ned so:

Jetz simmer gschpannt, was do wird cho …

E-Voting durestiere wänds, s’isch en Gruus:

Debi chömes ned emol bim Zytmässe druus!

Zum Teschte wänds jetz – s’isch zum lache,

„Die Post“ als Bock zum Gärtner mache …

I d’Sunne goh, muesch nümme welle,

i der Woog chasch Güggeli gli nümm bstelle:

Gastronomisch bliibt jetz Windisch zrugg –

Wenn chunnt dä „Stadtklatsch“ äntlech z’Brugg?

Im Kantonsspital det z’Aarau obe

Maches was’s wänd, s’isch gar ned z’lobe.

A d‘Kandhare muess me näh dä Lade

und fusioniere mit em KS Bade …

Statt Nike isch bim Federer jetz UNIQLO Mode -

sini Schwiizer Fans sind drum am Bode:

Das Outfit tüends ned i d‘Schwiiz exportiere!

Hey Rodscher, tuesch Di ned geniere?

De Trump tuet täubele, er wott die Muur –

De Stadtrot wott, do bliibt er stuur,

dä riesig Riegel näb der Alte Poscht:

Ach Barbara, dis Grüen het Roscht …

O Effingerhof, du grossi Chance!

I de Workshops grote d’Lüüt in Trance.

Doch s’Kornfelds merke meini gli:

Sie sette-n-au Peschtalozzi sii …

Eurofighter? FA-18? Gripen? Rafale?

D’Amherd Viola het d’Qual vo der Wahl.

De Nicollier chüschelet ihre-n-is Ohr:

Mir schlönd doch jetz en Space-Shuttle vor!

Drei Brugger tüend schints mit sich ringe:

Eb si Fasnachts-Värsli welle singe.

Die selle sich oute, s’wird sicher en Hit -

solangs no d’Brugger Fasnacht git …

Das Theater i der Schuelpfleg Windisch

riimt sich praktisch nur uf „chindisch“.

Tuet ächt de Kanton det intrigiere

zum d’Schuelpfleg-Abschaffig propagiere?

D’Franziska Roth im Dauerfruscht –

Macht so s’Regiere ächt no Luscht?

Ein Ehrgiiz loht sie ned lo lampe:

E jede Fettnapf ine trampe …

Das Motto vo dem Brugger Fescht

isch genial, isch eifach s’bescht:

Nach der Beizetour, mit runde Bei,

chunnsch „verfärbt“ statt „blau“ am Morge hei …