Värslischmitte Brugg

Fasnacht
 

Die 3 vo Brugg 2017

Die 3 vo Brugg si uf dr Jagd       

Weidmannsheil, Weidmannsdank…….Schnitzelbank

Disharmonisch  expressiv
bombastisch und au progressiv
opulent und glamurös
generös fascht  mysteriös
all das zäme git es Getto 
z Brugg heisst das jetzt Rigoletto


Bisch als Mensch hyper aktiv
und übermässig kreativ
bisch viel am seckle und am brichte
wotsch politisch alles richte
z viel Idee – viellicht e Splin
do hilft bekanntlich Ritalin
im Facebook täglich au im Bild
denn isch's dr Pesche Haudenschild


Referendum und Motione
tüen sich mängisch wirklich lohne
i dr Zytig - neu es Tool
mir 3 vo Brugg findet das cool
öppis lit eus uf em Mage
drum göhn mir däm jetzt au an Chrage          
zum Glück gits jetzt Petitio
mir sammle Stimme ....... no dis no
e Bitt an alli – mached mit
dass es d AZ anders git !


Sit Wuche find ich nümm dr Rank
ich glaub ich bin jetzt richtig krank
es dreiht sich alles aggressiv
bin sureal und negativ
phantasiere - irrational
mi Psyche lyydet,  es isch fatal
Diagnose vom Dr. Schlump
gute Ma: si hei dr Trump!

Uf d Repol Brugg do si mir stolz
stur und stark wie Eicheholz
als Läbensretter au ganz toll
au mir si do des Lobes voll
din Fründ und Hälfer in dr Stadt
bim Buesse schrybe, isch das nümm glatt
rächtlich gseh sind die zwar top
doch menschlich ab und zue en Flop
mir schänked ihne zum Bewys
dr Trachsel Heinz Gedächtnisprys
z Engelbärg uf dr Schanze
stoht e Springer und friert an Ranze
Bim Gedanke, dass er muess starte
seit er zum Trainer: i wott no warte!
soo git das kei Flugdistanz
kei Podescht , kei Siegeschranz
vor luuter Angscht gits blaui Lippe
dr Simi het glaub d Vogelgrippe


Im Stapferschuelhus Container siebe
isch s müslistill  - nit übertrybe
die 1. Klass chunnt voll an d Gränze
gfrogt sind hüt jo Kompetänze
die müesse scho, s isch nit zum lache
im Schueh zuebinde dr Master mache


dr Didi Berger als Präsident
vom Zentrum Brugg isch top präsent
er plant jetzt drum e Iniatitive
für meh Gschäft als Perspektive
er macht sich scho e paar Gedanke
s hät no Platz für 3,4 Banke


Dr Parmelin und sis Kader
wünsched sich es Bomber Gschwader
FA18 – PC 7
das isch egal und übertriebe
doch heimlich händ s scho investiert
und d Flieger au scho kaserniert
si üebe scho, das isch nit gloge
en Agriff händs a dr WM gfloge


Regierigsrot isch neu d Frau Roth
wärs nicht checkt – jetzt isch es spoht
s'Gedankeguet vo dere Frau
rechts usse, nimsch es ganz genau
und tuet si's z'Aarau gar nit raffe
bim Trump chönnt sie no lang go schaffe


Alternativi Energie
jä, weli sell‘s schlussändlich si?
En Antwort het do   euses Brugg
s‘isch engagiert  und lot nit lugg
Eusi Stadt will das uusreize
und tuet sis Personal verheize


Sig sag sug und Du bisch duss
dr Moser Dani, dä macht gli schluss
er freut sich scho uf si s'Schiff
ändlich öppis fescht im Griff
e Tip bechunnt er no vom Urs
fahr denn nüm so en zick zack Kurs