Galgevögel 2017

Unser Klima - isch viel z'warm
Hochwasser gits - und me Alarm
E neuis Phänomen - wo niemert kennt
Dä blond Tsunami – als President

Skandal in Austria - im Nochberland
Zwei Wahle verlaufe - voll im Sand
Und trotzdäm wötti - und blib derbi
Lieber Öschtricher - als Amy sii

Kübler Ferdy – Dimitri - Castro
Sind mit 80 und 90 - in Himmel cho
Nit für jede muess d’Latte - so hoch hänge
Bim Trump - do wurd au 70 länge

Der Donald Duck – mir wüsses gnau 
Het nie Gäld – isch aber schlau
Bim Donald Trump – wie Gschicht uns lehrt
Isch die Sach - grad umgekehrt

Däm Ego-Maa - goht's nur denn guet
Wenn d’Wält ihn - stark beachte tuet
Sit ich gseh – wie die im Schyssdräck sinn
Dunkt mi der Blocher – nümm so schlimm

De Trump de meint - är sig scho rächt 
Nur d’Präss die schribi - vo ihm schlächt
Am Änd haut är ab – wenn er no chann
Mit sinere dolle „Hair Force One“

Nochwuchsorge - het d’CVP  
Do het der Darbellay - en Idee
Luschtvoll tuet är - ganz verborge
Partei-Nochwuchs grad - sälber bsorge

Bundesrotsfoto – im Plakatstil 
Doris ganz obe – mit viel Profil
Ueli de Pächter - dä führt de Mischt
Schneider-Ammann - als Statischt

In St. Moritz – han ich mi gfreut   
Bi uffegreist - und has bereut
Zwüsche de viele Slalomstange
Wo s’Färnseh tuet si Kabel spanne
Und denn ihri Kamera hange
Damit si gueti Bilder fange
Het d’Armee e Flugzügpanne
Me muess no fascht um s’ Läbe bange
Nach all däm - bin wider gange     

In Gipf-Oberfrick wohnt - Nancy Holten - froh 
Gärn würd si sich - ybürgere loh 
Si isch - well Glocke lüte z'Nacht
Us däm schöne Traum verwacht

Juhui de Aargau het en Vision
Landesusstellig - i dere Region 
Das Projekt kunnt z’Stand - muesch nit studiere
No bevor Brugg-Windisch - tuet fusioniere

Bi Rigoletto-Bruggo - lauft alles chrumm  
Meh Lüt uf der Bühni - als im Publikum
Die nägschti Opere – wird sehr interessant
De gross’ Konkurs - vom Intendant  

Polizei in Brugg packt – s’isch nit zum sage 
De Trachsel Heinz - brutal am Chrage
Si behauptet fescht - und blibt derbii
Es sig - en Schwerverbrächer gsi

Wenn wäg’ de Klassegrössi - es Chaos droht 
Chunnt guete Rot – vo der Frau Roth
Es sig nit z’spoht – wenn me jetzt afot
Mit Ritalin – uf em Pausebrot

Es wüsset alli – vom Richi Fischer   
Dänker - aber kei Fischer isch er
Wird är Stadtroot – goht nüt me schief
Und Zytig kriegt weniger - Läserbrief

Metzler, Wettstein, Geissmann, Däpp... 
Die chöme eifach nit vom Fläck
Und alli - tüend so fründlig strahle
Uf Plakat - bi de nägschte Wahle

Spieglein, Spieglein an der Wand  
Wär wird Stadtamme im Brugger Land 
Für e Moser bruchts – mir lönd nit lugg
Mindeschtens drei – Die 3 vo Brugg