Värslischmitte Brugg

Fasnacht
 

Oschterzäpfe 2016

De Donald & de Dagobert das sind zwoi Watschelänte,
der eint naiv ond domm, der ander riich ond bald in Ränte.
En Mischig Donald, Dagobert ond blinde Elefant,
am Schluss wird de no US- Presidänt:  de Donald Trump.

Dee Drogebaron z’Mexico esch dor de Tunnel gange,
so haut er ab & glii do druuf do händs en weder gfange,
er chonnt weder in gliiche Knascht… ond was wird jetzt passiere,
wette de wird bald weder dor de gliich Tunnel marschiere…

D’Hillary raucht en Havanna, das esch deet jetzt in,
ond es Gläsli Rum liit gäg der Obig zue au drin,
wenn si met ehrem Maa i de Ferie nömm deheime sei,
Sie heigi ghört z’Guantanamo heigs scho zwoi Plätzli frei.

Late Service Public gits bald nömm met Giaccobo und Müller,
Late Service Public gits bald nömm met Giaccobo und Müller,
Late Service Public gits bald nömm met Giaccobo und Müller,
Late Service Public gits bald nömm, drom fehlt jetzt do de Knüller.

E Wält so wie’s de Piccard wett, das wäri doch voll chillig.
Alls lauft met Solarbetriib, doch s’wär beschtemmt ned billig,
wennt fahrsch doruf & s’wert grad Nacht im Lift vom Eiffeltorm,
bes denn weder d’ Sonne schiint, wartsch’ deet drin bes morn.

Spare bi de Landwirtschaft macht Sinn, da säg ich eu,
ich ha drom jetzt e Lösig, för ali Chüe ond Soi,
z’Oschteuropa chönnteds weide, das miech völlig Sinn,
be so vell neue starche Hääg, do bliibtets secher drinn.

Die dütschi Polizei die hets grad sträng, ehr wösseds au,
z’Köln zom Biischpel Aazeige vo jeder dritte Frau,
us luuter Fruscht versänked si es Auto grad im Rhii,
Doch d’Lösig esch ganz eifach: s’esch en VW Diesel gsii.

En Türk verschüsst en Russe-Jet, das git en heikli Sach,
D’Russe findets ned so glatt, es git en riise Krach.
Doch de Türk hets nor guet gmeint, hets nor es bitz verbockt,
es hätt jo chonne sii, dass deet de Putin denne hockt.

D’ Schwizzer wohned i de Schwiz, d’ Islameschte in Islamie,
das esch jo quasi logisch, doch passts niemerem in Plan ie.
Nor so zor Erinnerig för all Obama-Fän,
de het doch vo Aafang a scho xeit: „IS – we can!“

Vom Kim Jong Un hesch lang nüüt ghört, denn tuet er Bombe teschte,
die ganzi Wält die esch empört, es haglet vo Proteschte,
doch ergendwie chan ich’s verstoh, was er het gmacht do chörzli,
hämmer als Buebe doch au gmacht – eifach met Fraueförzli.

Kein Atommüll im Bözberg – en KAIBe gueti Sach.
Ond kei Löcher im Reakter, höggschtens eis im Dach,
kei Doppelspuur im Gotthardtunnel wärdi denn deet gmacht.
Das esch das won ich so träum, & was träumed ehr znacht?

Roger, Stan, Belinda ond Martina das sind hüt,
i de Tenniswält för’d Schwizz die allerbeschte Lüüt,
de stärchschti Ufschlag aber max au eu ned rechtig passe
de händ no immer Prämie vo de Schwizer Chrankekasse.

De Schnee de schmilzt, de Früehlig chonnt es stinkt nach Heu ond Gülle,
d’Puure triibe d’Chüe of’d Alp, e wörklechi Idylle
do rotscht no eine d’Weid dorab, er hets pressant ond fluecht
das esch en schwiizer Schiifahrer wo’s Ziel verzwiiflet suecht.

Wenn d’ Schwizzer uf de Pischte met de Schii ned schnäller wärded
Denn esch au no de letschti Sponsor of dem Triggo gfährdet
ich hätti set paar Johre scho en andre Sponsor gwählt
S’isch Pet-Recycling Schweiz – die säged „Jede Flasche zählt!“

Die letschte Vers – er händs doch gmerkt – die hani scho mol brunge,
doch bliibet die halt aktuell, drom hani si jetzt gsunge,
ganz ökonomisch-ökologisch han ich die drum gwählt
Recycling esch doch emmer guet und jedi Pionte zählt.

D’ Frau Widmer-Schlumpf esch nömm im Bondesrot – mer hets vernoh,
deför händs jetzt de Winzer gnoh –s’hätt schlimmer chönne choo,
zom Glöck händs ned d’Martullo gwählt – die passt deet ned in Chratte!
Die wäri statt en Bondesrötin ehner d’ Bondesratte.


Die Wahl in Bundesrot letscht Johr esch absolut kän Krimi,
an Globi ond an Junge do, do glaubt ned mol de Gilli,
& Spannig chonnt e keini uuf – vo dem her zemlech miis,
well all Sprängkandidate, jo die göhnd id Luft z’ Paris.

De Freysinger esch ned in Bondesrot ie choo – chasch tänke,
de Blatter de brucht niemer meh, ned mol zom Poschti länke,
die fahred automatisch – chomm, d’ Walliser chasch vergässe,
& so lang’s no git vo dene händ die Wölf deet öppis z’ frässe.

De Constantin de konstatiert, dass d’ Walliser nömm bruchi,
„Mais zut-alors, c’est pas comme ça!” – mäldet sech de Ruuchi,
wer wördi denn, s’ gäb niemer sosch, wo das chönnt öberneh,
wo chönnt e so vell Fuessball-Trainer-Jobs pro Johr vergeh.

Es Loch vom Zürcher Hauptbahnhof uf Oerlike händs gmacht,
do händs scho 2, 3 Woche dra, das hesch ned über d’Nacht,
jetzt müend die Züg nömm cheere deet, glii zöckeds die neggscht Charte,
ab em nöggschte Fahrplanwächsel mues kän Zug meh z’Zöri warte.

Sächsilüüte - chasch vergässe. Au de Morgestraich,
am Morge am 4i d’Fasnacht starte, läck esch das en Seich!
Öb Basler oder Zürcher – send doch beidi ned vell schlauer:
Wer het längscht, wer het de gröscht … ich mein de gröschti Tower.

Met em nöchschte Lohn do chauft der Ueli sech es Töffli,
Do lüütet er uf Herrliberg ond seit „Hei du Christöffli.
Weisch jetzt als Finanzminischter, mach ich ein uf coole Siech,
fahr Töffli ohni Helm ond chorzem Hämb - so wie de Griech.“
Orange wachsed ned be ois, das händs jetzt usegfunde,
deför hets Salz im Bode – drom heissts jetzt Salt, sägeds de Chunde,
met dem Namenswächsel händs eus nor, schaurig miis uustrickt,
es wird der jede Monet jetzt en gsalzni Rächnig gscheckt.

De T – Punkt - B. vo Winterthur esch nömme reformiert,
er het höt morge online zo de IS konvertiert,
jetzt suecht er för uf Syrie so-nen Sälbschtmord-Charter-Dings,
ond buecht diräkt bem Spezialesch deför - be Germanwings.

Letsch Sommer, wies im Büechli schtoot – esch das eine gsii,
die Sonne ond das Klima – heiss- ond schöner chönnts ned sii,
do han au ich chlii Schatte gsuecht ond au erfolgriich gfunde,
all 2 Stund’ vom Zeppelin – för öppe 3 Sekunde.

S’het eine gmacht am Wiehnachtsmärt was d’Repol ned verchraftet,
drom händs das Brugger Orginal a Ort & Stell verhaftet,
Mer weiss ned rächt, wer esch das gsii, mer zuckt nor met der Achsel,
velecht de Kuen, velecht de Baur oder velecht de … Moser?

Luegid vo Bärg & Tal               
De Frankekurs stiigt brutal               
D’ SNB wott en nömm stötze,       
doch setti die d’Wirtschaft beschötze,   
d’Industrie-Zahle sind rot,                   
de Tourismus hockt au i dem Boot,       
d’Wirtschaft im Land goht ka-boot.       

(Dr Ferdinand esch gschtorbe)
Arbetsplätz sind gföhrdet, oje-oje-oje,                   
Arbetsplätz sind gföhrdet, mer gfördet immer meh,    
Be jedere Abstimmig, ob’d „Jo“ sitmmsch oder „Nei“
Arbetsplätz sind gfördet, drom bliib de-hei!       

Arbetsplätz sind gföhrdet, oje-oje-oje,                   
Arbetsplätz sind gföhrdet, mer gfördet immer meh,
Zom Biispel, grad min Nochber, de dütschi Axel Huber,
de fahrt jetzt nömme Taxi, de fahrt jetzt neu för Uber.      

S’Ramseiers wei go raaaase   
Be dem Moschtpriis no en Rundi meh!   


F/A-18, F/A-18, flüügsch du noh, flüügsch du noh,
oder besch scho crashet? oder besch scho crashet?
So chas goh , so chas goh.


Gang rüef de Brune, gang rüef da Schwarze,
sie söled allisamt, sie söled allisamt,       
gang rüef de Syrer, de Eritre-er,           
sie söled all.. …. uf Europa choo.       

Hüaho, Frau Merkel, hüaho,                       
chömed Gescht sind sie zerscht mol schaurig froh,   
aber wänds denn nömme hei ond es chömed emmer meh,
denn hets denn bald z’wenig Lasagne.                   

S’ Git Lüt die wörden-alletwäge nie,           
eim id’s Gwösse singe – so wen ig jetz hie,           
eis singe um kei Pris – nei phüetis nei,           
well si kei Zivilcourage me hei.                   

Si dänke velecht  scho im grund ned schlächt,       
doch förchte si – chomm lömmers - dasch scho rächt.   
Ond s’laschtet ufne we ne schwäre stei,       
dass si kei Zivilcourage me hei.               

i weiss es macht eim Eländ, verschlat d’Stimm,   
doch tünkts eim doch das esch jetz wörklech schlimm   
s’wär besser – sowohl osswärts wie dehei,           
wemmer Zivilcourage weder hei.               
 


Poscht-it, poscht-it, sonen shit jo, sonen shit,       
Doch poscht-it, poscht-it, es findets all en riisehit,       
Poscht-it, poscht-it, chom mer poschted jede shit,   
Poscht-it, poscht-it, ond alli mached mit.       

Be vorher grad im Reschti gsii, ha ned alls möge ässe,           
zom Glöck grad no es Foti gmacht ond d’Wält wird’s nie vergässe.   

Chörzlech do hets grägnet, ich ha es Foti gmacht,   
ond spöter no vell besser: es rägnet i de Nacht.   

En Fehler i de Spiischarte - hani poschtet   
Es Auto met ere Panne - hani poschtet       
D’Kassefrau wo zwenig tippt - hani poschtet   
& Die wo z’vell Usegäld git - hani poschtet   

de Tankdeckel offe gloh, - hani poschtet   
ha im Lotto nur en 2er ghaa, - hani poschtet    
en Gable mit Spiisräschte draa, - hani poschtet   
es Ventildeckeli het gfehlt, - hani poschtet        

en Strosselampe wo ned brännt, - hani poschtet       
dr Unfalll uf dr A1 - hani poschtet,           
min Stimmzettel hani uusgfüllt, ond denn poschtet   
be hüt Schnizelbänk go luege – sind schon poschtet.   
       
min Toaster het det Toast verbrennt, z’lang toschtet,   
sälbverschtändlech hanich das au postet.       
de Poschtizeddel dehei gloo, hätt en doch poschtet…   
denn hätt i de Migro s’Richtige …  au poschtet.   

Z’Nacht a de Bar do starrt er lang uf ehres Hinderteil,
si chert sech ond er tänkt vo vor’ esch si ned minder geil,
er heissi Robert - ond si seit ganz  knapp „Heidi“,
„Läck, das Arsch!“ - das tänked schliesslech beidi.

En Elefantehuut, chönntsch meine dass die schötzt,
zom met ü50 de Job no phaltee - het ned gnötzt:
Verbii esch d’Ziit vom Elefanten-Apéro,
met 2,3 Geisse macht de Knie no Streichelzoo.

Bem Schwiizer Fernseh do stiigt de Druck zum Spare,
drom wot mer d’Programmchöschte langsam abefahre,
ond e 5 Johr, ich säg euch, s’wird ned glatter,
do gsesch de ganz Tag d’Wiederholig vom Bestatter.

Ond denn e 10 Johr, mer händ en emmer satter,
bringets no’d Best of Version „10 Johr Bestatter“.

Es esch die Wiehnachtsgschicht das mol chli andersch gsii,
die us em Morgeland händ gar kei Gschänk debii,
ond obs de Heiwäg weder finded esch no offe.
ond statt en Stern do händ si d’Angie Merkel  troffe.

„Hört mal: Wir schaffen das …“ seit sie ond meint „Willkomme“
Doch wo so vili chömed wörkt sie chli benomme…
Das heig si ned so gmeint, stöhnt sie ond dänkt: „Oh Graus!
Ich glaub wir schaffen das … doch alles wieder aus.“

D’Schwiiz als Tourismusland het Krise wäg de Priise,
jetzt tüend au d’Flüchtling no do d’Stimmig eus vermiise,
nor guet 5 Tuusig … Asyl-Aträg letscht Johr,
Ned mol die Flüchtling wänd zo eus – dasch wörkli wohr.

Jo be der Alstom – esch wörklech alls domm gloffe,
vom GE-Jobabbou sind Hunderti betroffe,
ob F/A-18 minus zwoi ächt F/A-16 git?
Das kontrolliereds velecht einisch mol zor Bürozit.

Be de Kanalbank do hets Gäld no müesse schaffe,
das händs vor 10 Johr eus verzellt bem Fernsehgaffe,
doch mittlerwil’ het sech das Gäld lo pensioniere,
& mer als Chonde müend ehm d’Ränte finanziere.

Was die im Campus mached wo deet tüend iicheere,
es esch jo secher so, dass die deet öppis lehre,
ond das esch ned nor immer fiire ond vell saufe,
jetzt chönnd die Studis au no psoffe Schliifschueh laufe.

S’wott en Studäntin nach em Schliifschuehfahre hei,
doch si fahrt los & merkt, sie het en schwäre Stei,
sii nemmt de Zug lieber – doch wird das ziitlech knapp,
drom fahrt si met em Auto grad deet d’Stäge-n ab.

Jetzt esch das Barbie Bäbi ändlech nömm so schlank,
es het jetzt do ond deet ändlech emol en Rank,
ond för de Genderaspäckt do fehlt dem Ganze,
jetzt no en Ken, met eme Bier-Ranze.

Wenn ich mol 92zgi be tue-n ich früeh-pangsioniere,
ond zwoi Johr spöter tüend denn Brugg und Windisch fusioniere,
Doch s’esch ned wohr, ich träume nor, so zwick mi doch in Arm,
S’esch alls denn no wie früehner: eis esch rich ond eis het Charme.