Värslischmitte Brugg

Fasnacht
 

D' Oschterzäpfe 2017

Mängisch mues ich lang go wüehle, wiit onder de Tisch, 
Zom wösse was do z’Brugg ond z’Windisch alles gloffe-n-esch,
ond stell der vor d’Frau Clinton wäri Präsi worde - nei
Denn wäär-ich jetzt scho fertig ond ich giengt scho weder hei.

Wenn ehr meined d’Schnitzelbänk won ich euch amig bring,
siged all nor glatt ond loschtig - & mieched gar känn Sinn,
denn händ ehr Rächt well s’meischte das esch nome Fake News  - klar,
doch leider meischtens s’Krassischte das wird am Schluss denn wahr.

De Donald & de Dagobert das sind zwoi Watschelänte,
der eint naiv ond domm, der ander riich ond bald in Ränte.
En Mischig Donald, Dagobert ond blinde Elefant,
am Schluss wird de no US- Presidänt:  de Donald Trump.  

Es sind scho arroganti Cheibe deet zAmerika,
die setted ab ond zue scho mol en Trump is Füdli haa,
dass die das au grad checked händ, ich stuun, die chömed druus.
Die wähled ihres gröschte Arsch sogar is Wisse Huus.

De Trump de esch jetzt Präsident – ich hans euch letscht mol gseit.
Doch lached nor, wenn ehr halt wänd, ich ben eine wos vertreit.
Zo Frankriich ond Italie chönnt ich’s eu jetzt au scho säge,
doch ehr alli wörded das glaub ned au no verträge.

D’Miss-Texas, -Utha ond –Ohio händ en neui Stell,
Sie schaffed jetzt im Wisse Huus, zwar hübsch aber ned schnell.
Nor ei Erfahrni esch no deet – de Trump esch en Schlawinski,
die hets jetzt schtäng im Oval office: D’Monica Lewinski.

D’Balkan-Route ond s’Mittelmeer sind nömm so frequentiert, 
jetzt esch es glii en andre Schlag - wo zo ois migriert,
kei Wertschaftsflüchtling, nei, s’send all politisch motiviert,
sie chömed all diräkt vo deet, wo de Trump regiert.

Jump ond Dump ond Schlamp ond au so knapp no Elefant,
das esch öppe d’Grössenornig wo sech riimt uf Trump,
Eine esch jetzt toppet worde. Drom gohts jetzt glaub au ohni,
Danke, tschüss ich bruuch di nömm, ciao Silvio Berlusconi!

Er provoziert ond macht all fertig, het die ganzi Macht,
phaltet die ganz Wält in Atem, wer weiss wenn’s mol kracht,
de Maa esch onberächebar – weisch ächt wär i meine,
Kim-Jong, Erdogan, Putin ond Trump - wähl sälber eine.

Min Nochber näbe drah, ja das esch sonen Mexikaner,
er schaffet nüt, esch arbetslos, nor stämpfle, jo das chan-er,
drom luegt er au de ganzi Tag nor emmer i mi Huus,
drom han ich jetzt en Muur uufgschtellt ond stell ehm d’Rächnig uus.

Französich: Nei, au Änglisch nömm, ond Russisch chasch vergässe!
EU, Russland, USA – die geheied all uf’d Frässe.
Jo, Zuekunft sig em ferne Oschte, was do immer lesisch,
drom schick ich mini Chind sit Afangs Johr is Früehchinesisch.

De Erdogan de droht mer, falls ich mol id’ Türkei reisi,
denn chiemti deet en Knascht, drom gohn ich nömm det he, das weiss i,
ich lüüte-n aa ufs Konsulat, deet hänzi mer verzellt,
s’sig well ich mol z’ Antalya en Schwiins-Kebab heig pschtellt.

De Castro wäri gschtorbe meined all – doch s’esch ned wohr,
das esch en Fake, warschindli so de gröscht vom letschte Johr,
„make America great again“, dem will er nie begägne,
drom het de Fidel twittered er wördi gar nömm läbe.

Die 9-11-Flüüger die händs nömme chönne stoppe, 
das esch scho zimli krass – doch d’Amis händs no chönne toppe:
11-9 isch d’Wahl vom Trump – die händs jetzt öbertribe,
do simmer i de Schwiiz jo trotz dem Gölä grad no zfride.

Wenn ich de Meersouchäfig amix ab & zue tue meschte,
tuen-ich onderem Sagmähl au no Ziitige ed’ Cheschte,
wo-n ich för das en AZ met em Bild vom Trump han gnoh,
do het sech d’Meersou gweig’ret weder zrogg ed Cheschte z’goh.

Ich ha min Nochber & si Frau emol bem wähle gseh,
de wählt en Mix os SP-CV-SV-FDP,
& wenn denn mol sis Töchterli met 16 wähle cha,
denn glaub ich gets en Mix us H&M ond C&A.


Ha jede Stutz  ufs Sparheft too, zu 6,5 Prozänt,
ond bringsch höt Gäld uf’d Bank so leisch no druf - dasch uverschämmt!
Mine Chinde hani gseit, sie seleds andersch mol probiere,
Die tüend täglech vor em Chindsgi jetzt met Aktie spekuliere.

Stars and Stripes ond Wahle gits im Aargau ond de Staate,
beidi wähled weder Sozial- noh Demokrate,
jo däne nämeds irgend so-nen Depp – nor jo ned d’Frau,
be ois do bruchts e Frau – nor was die cha weisch ned so gnau.

D’Öschtricher händ sech verzällt, verwählt ond schliesslech gwählt,
au d’Amis die händ sech verwählt – ned gmerkt ond drom hets zählt,
wenn sis denn mol merked det – han ich en Tipp - chasch dänke.
wennt emol falsch gwählt hesch, dee eifach schnäll ufhänke.

Vom Putin han ich em Fall welle au no ein Värs bringe,
han Wörtli gsuecht & Silbe zellt & has denn welle singe,
doch ha denn gmerkt: das wörd ned goh, das gäbt es Riise-Gschlamp,
& d’Pointe wär die gliichi gsii wie bem ’ne Värs vom Trump.

De Schneider-Amman seit ois was’ zom xond-bliibe muesch mache,
es seig doch gar ned mol so schwär, muesch eifach immer lache!
Wenn ich ehn ghör am Fernseh rede weis ich jetzt was mache,
au wenn’s wörklech zom Brüele wär – mer söll-en doch uuslache.

De Parmelin esch suur - de döff  kei neui Flüüger haa,
de Trainsoldat hed früener s’eiget Ross deheime ghaa.
Höt chönnted jo d’Rekrute – glaub de Guy hätt sicher Freud,
id’RS ihre Drohne neh – s’wär sicher jede zwoit.

Im Bundeshuus do gits en Knall – s’wird alls evakuiert,
au Toti ond Verletzti chönntis geh – s’het explodiert,
nor s’ Bekennerschriibe fehlt no vo IS oder Bin Lade,
do chonnt es Mail vom Ueli – er heig nor s’Samsung-Handy glade.

Die BDP die gits grad noh – wie lang das weis mer ned,
die sind scho froh, dass’ nor grad all 4 Johr so Wahle git,
doch bald scho sind die weder vom Politalltag devoo.
drom gits jetzt denn es BDP-  -Ghääg im Zürcher Zoo.

Bem Gubrischt gits die dritti Röhre, läck esch das genial,
meh Stross git meh Vercheer ond au meh Staufläche-Potential,
bem Gotthard ähne chönnteds grad met fahre ganz uufhöre,
miechted si för jedi Rechtig grad öppe 5 Röhre.

De Schnee loht immer länger uf sech warte i de Alpe,
do muesch halt statt uf’d’Schii chli uf de Wiese ume tschalpe.
Do beni letscht Dezämber mol zunre Alphötte ueh-gloffe,
ond wird’ us eme Hinterhalt von’re Schneekanone troffe.

De CVP-Maa Darbellay goht frömd ond macht es Chind,
das seig en Form vo Nöchschteliebi, das wo mer do gsehnd.
Ond das seig doch jetzt Vorschrift worde, doch de het es Gnuusch.
De meint es bruuch de genetisch …Informationsuustuusch.

Im Lager frogt de Choch als erschts: „Het öpper Zöliakie?
Wer isst vegan, wer het Laktose- Erdnussallergie?“
Do rüeft de Maxli: „Ich ha nüt!“ Do seit de Choch: „Du Pörschtli,
was meinsch denn du för eine elei do gits kei Extrawörschtli!!“

Ich gang id Limmet, Rüss ond Aare zemli vell go fische
ond chan drom ab und zue dehei Egli-Filets uuftische,
doch geschter chonnt en Polizischt ond tuet mi zämestuuche,
jetzt chasch de blödi Swisspass ned emol zom Fische bruuche.

Ha z’Schofisheim mis s’Auto zeigt, s’esch nömme dorecho.
Chli Roscht, chli z’vell. & d’Kopplig futsch ond d’Brämse händ lo goh!
Drom han ich en Chli-Reakter i mis Auto boue loh, 
vom ENSI alls loh prüefe: „Alls perfekt, chasch weder goh.“

Z’Brogg es Gartemüürli, ufem Bözberg en Passant,
z’ Huuse ähn e Chatz, ond z’ Schinznach-Dorf  no en Hydrant.
Knapp am Amphi gschtreift ond denn frontal is Chileschiff,
aber sosch do het min Urgrosvatter s’Auto noh im Griff.

z’Tschernobyl händs de Schutzschild bbout, en neue Sarkophag,
bruchts ächt z’Beznau au glii ein – das wär do mini Frag,
so’n Teckel esch zwar dicht aber nüüt schöns för d’Chind & Gescht,
doch wär mer letscht Johr froh gsii drom, do z’Brugg am Jugendfescht.

De Dani Moser esch en guete Maa, Brugg esch z’beniide,
schad will er ned nomol einisch es paar Jöhrli bliibe,
wer nochähr chonnt esch secher au ned schlächt – wemmer tüend bätte,
dass d’Brugger Frau Regierigsrat ned äxtra tuet zruggträtte.

Letscht Woche ben ich guet versteckt bim schwarze Turm uf Pirsch,
was ich ha welle jage esch käs Reh & au kän Hirsch
Do nöcheret sech s’Ziilobjekt, sin Träger liecht betagt,
De Trachsel Heinz nor knapp verfehlt – uf de Plaggette-Jagd.

Be chörzlech be de Campusstross dor’d Underfüehrig gange,
do gsesch kän Chnoche, ned emol es Wahlplakätli hange.
Do geshn ich paar Täg spöter öberrascht mech i de Ziitig: 
„Erschter Mensch durch Unterführung, ging am letschten Fritig.“

Die rächti Szene macht Konzert, was niemer wörklech freut,
mer weiss amig ned wo, es wärded wenig Infos gschtreut,
be eus – es het en Grund – wär so’s Konzert doch ideal,
s’hätted alli Freud: s’wär öppis los im Campussaal!

Die Brännstoffzälle-Poschtauto, au die tüend ned rentiere,
mer weiss au ned so gnau wenn mol so’n Tank wird explodiere,
de Nervekitzel bliibt eus noh au ohni Poschti-Reis,
die nöggschte Hundert Johr – met Leibstadt, Beznau 2 + 1.

Old McDonald had a Farm – I ei I ei oh,
And on his Farm he had a cow, ….             
And e moo moo here and a moo moo there,             
here a moo, there a moo, everywhere a moo moo        

Old McDonald was to rich – i ei i ei oh,
He owned plants, towers and some bridges,    I ei I ei oh      
And a building here and a building there,
Here a build.., there a build… everywhere a building,

Old McDonald made a Joke – i ei i ei oh,
He want’s to become president – I ei I ei oh
And a “haha” here and a “haha” there
Here a “ha” there an “ha”, everywhere a “haha”.

And then his Joke ended in thruth – I ei I ei oh,
Die ganzi Wält chonnt nömme druus – i Nei i Nei oh…

Ganz z’usserscht usse, ond ähnet em Meer,             
do liit e grosses Stück Wält,                    
e chli verpeilt ond verschlosse sends deet,             
i dem grosse Stück Wält,                          
ond eine de händs, de wänds deet als King.            
Blos en riiche Maa, met ziemlich chline Händ,         
En ganz en blöde Maa, wo jedes Chind scho kännt,    
ond wenn au ufem Globus überall din Name stoht,      
besch du doch en Ma wo alles Gschirr verschlot.    
Muesch zuegeh, du hesch statt Schiiterbige Woklechratzer, 
musch’zuegeh High Society statt Damerige                 
gohts im Land deet usnahmswis fidel ond luschtig zue,     
sinds bim nöcher luege sicher d’Mexikaner… 
Hau – doch – ab.                    

Hüaho, alter Donald, hüaho,                            
Giengs berguf wärsch du glaub noh zimli froh,                 
aber s’goht glii alls bergab, ond s’gsehts nömm guet uus för deh,    
drum gits us deer jetzt glii Lasagne.                         

Hee. Der z’Amerika, heit ers kapiert? Der heit nech gloub zemlech TRUMPiert!

Z’Nacht a de Bar do starrt er lang uf ehres Hinderteil,
si chert sech ond er tänkt vo vor’ esch si ned minder geil,
er heissi Robert - ond si seit ganz  knapp „Heidi“,
„Läck, das Arsch!“ - das tänked schliesslech beidi.

Jetzt gits vo Brugg – en Frau Regierigsrat, 
die kenned alli Brogger  –  nome vom Plakat,
doch wert die gwählt – ond alli meined „ouu“,
händ gmeint seg s’Monschter, vom Pokemon Go.

Es het de Gmeind-amme de vo Wohle,
jo müesse goh - das het d’ Regierig so befohle.
De sell jetzt fort ond mit ehm alli alte Zöpf,
die ässed ned emol meh Dubler-Mohrechöpf.

Es goht en chüele Wind d’Frau Merkel lauft nömm gschwind,
d’EU ond d’USA sind nömm was mol gsii sind.
Ond wenn eus d’Russe oder d’Amis bombardiere, 
Chömmer im NEAT-Tunnel inne go campiere.

Jo de Panini - ond d’FIFA händ verluted
dass neu grad 48 Natione WM tschutted,
so gits meh Chöle, zwar ned för de Migrolino,
nei das esch d’Lohnerhöchig för de Infantino.

S’het de Bestatter sech scho fascht sälber bestattet,
won er zom Krimitreie z’Linn en Bsuech abstattet, 
Si händ de Träffpunkt gha be de Linner Linde.
Doch het er d’Adrässe vo deet ned chönne finde.

De cheibe Winter, de weiss nömme rächt wies lauft,
de hätt sech gschiider mol paar Schneekanone kauft,
drom gits bim Wältcup die Saison chuum mol en Start,
ond statt em Lauber-(horn) – gits d’Chabishorn-Abfahrt.

Jo eusi Winter send schon bitzli limitiert,
hed au de Hunziker Roli konstatiert,
drom git er s’Winterschäft jetzt uf – het er lo brichte,
ond glii wert s’NO vo NO LIMIT au gschtreche.

D’Opere Schänkeberg die macht met „Rigoletto“,
was ere Stutz aagoht es zemli deftigs Ghetto,
doch esch die Planig vo dene scho chli chindisch,
jo was erwartet die wenn’s ufspiled in Windisch?

Be mol dor Windisch gfahre plötzlech löschtz mer ab,
well deete d’Strosselampe lüchtet nor no knapp,
wennt mol dor Windisch woscht i de Nacht ganz ohni Gfohr: 
De nöchschti Supermond gits erscht i 17 Johr.

Zom echli Gäld verdiene, wenn au ned grad s’grosse
Will de Gmeindrot z’Windisch s’Bosserthus abstosse,
es wär en Möglichkeit, weiss ned ob si das wei,
mer macht es Parkhuus druus - förs Schloss Wildestei.

S’het ein als junge Bueb als DJ afoo tanze,
ond er het Vollgas geh ond goht emmer ufs ganze,
doch het er au als glii scho Räntner nonig gnue,
drom brucht de Bobo jetzt halt au so Küenzli-Schue.   

Es biibt de Roger – das settsch erfahre haa,
jo i de Tenniswält - euse beschti Maa,
de stärchschti Ufschlag aber, max au euch ned passe,
de händ no immer Prämie vo de Chrankekasse.

Als Chind han ich - för en 5er amix poschtet,
well jo die 5er Möcke gnau so vell händ koschtet,
aber höt do gits fascht nüüt meh – Gopferdteckli,
höggschtens bem Migros sones wisses Chrüschel-Säckli.

Jo weisch der Ondersched vom Trump zom liebe Gott,
esch nor dass Gott - nie de Trump si wott.
Warum de Trump esch wen er esch – weiss ned obts weisch,
De chauft scho lang för sech bem Manor z’Bade s’Fleisch.

Wenn ich mol 92zgi be tue-n ich früeh-pangsioniere,
ond zwoi Johr spöter tüend denn Brugg und Windisch fusioniere,
Doch s’esch ned wohr, ich träume nor, so zwick mi doch in Arm,
S’esch alls denn no wie früehner: eis esch rich ond eis het Charme.